الإثنين , أكتوبر 25 2021

الكورونا والناس الجهجهونا

ضِفاف يراع :

نحن بلد حكومتو وشعبو إتعودوا إلا يغرقو عشان يعومو ، الناس بتكورك ليها فترة قفلو المعابر زول شغال بالموضوع مافي والمصريين بقو يجو بالسودان حتي يسافرو للدول لأنو ما محظورين نحن لما جاتنا كبيرة وماتت حالة يعني مافي إعلان إصابة موت طوالي والشغلة كتمت .

المرض دا لمن بدأ في العالم الناس بقولو ليك الصينيين عشان كتلو المسلمين وبصيب الكفار بس الكورونا قشت الصين قش…… ، بعد شوية مرق من الصين ودقشت أوروبا الناس قالو بصيب الخواجات ومابصيب ناس أفريقيا الكورونا دقشت بلدان آسيا و إفريقيا السودانيين قالو ديل عرب ولونهم أبيض ومابستحملو زينا ( في البلاوي بتبرو من العروبة) وقالو إنو الفايروس مابعيش في المناطق الحارة الكورونا دقش السودان وجابها كبيرة موت طوالي وخلي وزارة الصحة والمستشفيات تتغالط إصابة ما إصابة وهم بتغالطو الدول وقفت صادراتنا ومنعت الطيران والجوا جوا والبرا برا والزول المات لفي جلقمية مستشفي ولاقي شنشمية دكتور وممرض ومريض .

ياخ نحن نلقاها من الصفوف ولا من الأمراض ولا من مغصة الحكومة ولا الكورونا ولا من الكيزان الفرحانيين بالوضع دا ولا…… الخ.

ياخ نحن في أي بلوة نصيبنا بكون أكبر نصيب وبنكون مبسوطين خاصة الناس البترقعو من الأزمات …… الخ

نحن شعب ممكن الزول يعطس في صينية الأكل ويواصل عادي

نحن شعب ممكن تسلم لي مية نفر وماتقدر تحرج زول حتي لو مصاب وتأكل بدون تغسل يدك

نحن شعب بشرب بي إيناء واحد في المطعم بي كل أريحية

نحن شعب بقيف في الصفوف وزول واحد مصاب ممكن يعادي نص الصف

نحن شعب بنندفس في بص 500 نفر وسعة البص 50 وبنكون مركبين سماعات

نحن شعب الفلس بخلي الواحد فينا يحك عيونو ونخرتو كل دقيقتين

نحن شعب فيهو قبائل عندها ثقافات هي ذاتها مسبب وناقل للأوبئة

نحن شعب بنتفرج ونتريق في بعض لمن نفقد السيطرة حتي نتحرك في الحلول فهل ممكن موضوع الناس تموت موت الضأن دا مابنطبق علينا

طبعاً الأيام دي أي زول بخترع ليهو وصفة لي مكافحة فايروس الكورونا ناس يقولو ليك قرض بالريق وديل كويسين وناس يقول ليك موز بالشامبيون وناس يوصفو ليك قشر الرومان مع البصل وناس يقولو ليك العرقي نص النهار وناس حجر النعام بالريق وناس الظهرة مع البيض والفلفل وناس بختنعو بالبادوبة مع شاي الصباح…… الخ . غايتو المشعوذين الله أداهم المرض دا لو لا قدر الله ضيع ليهو نفر نفرين من ناس القري والأرياف عروق اللعوت والنيم والكرمدودة والمصايب بتنباع جد والواحد ممكن يركب توسان .

ياريت الناس تتبع الإرشادات الصحية وحتي لو الموضوع دا طلع طلس عندنا هنا برضو لي خير لكن من ناحية هي حرب بايولوجية دا منتهي لكن الهواء ماشي علي وين والدولة الرأس دا المامعروف فنخلي الدول الكبيرة دي تتدافس ونحن نبقي في داب صفوفنا وحكومتنا العاملة زي آخر المرتب دي وربنا يحفظنا ويحفظ السودان هو ولي ذلك والقادر عليه.

كسرة :

لوكتمت في ناس كتار برحلو كنابي الخلاء لكن لاشجر فضل لا جداد وادي لا حفاير مياه وشوال العيش للكوجة بي 2000 والسمك الكوركي غالي الناس حتتحاصر شكلو بس السوداني بلقي ليهو حل يقنع بيهو نفسو لمن يندفن .

إيهاب بابكر
14/3/2020م

عن المحرر العام

موقع زراعي سياحي بيئي

شاهد أيضاً

لي وين السكة يا انت ؟

في السنتر مجاهد العجب #لعله السؤال الابرز والاهم والاكثر شيوعا عندما يلتقي مجموعة من الاصحاب …

اترك تعليقاً

لن يتم نشر عنوان بريدك الإلكتروني.

هذا المتجر تجريبي لأغراض الاختبار — لن يتم إستقبال أي طلبات. تجاهل