السبت , مارس 30 2024
أخبار عاجلة
موقع ايكوسودان اكبر موقع للاسواق العالمية
ايكوسودان

يا هو ده السودان

بقلم وداد حجازي
أقيم في إحدى قرى الجزيره بالقرب من مدينة الحصاحيصا والحمد لله متزوجه وعندي ولدين وبتين انفصلت عن ابوهم وبقي ما بسأل مننا ولا نحن ما بتسأل منه سبحان الله .
أراد الله بنتي الصغيره مرضت مرض شديد خلاص وما خلينا حاجه في العلاج من دكتور لي دكتور وكل مره يغيرو لينا العلاج في النهايه قالو لينا تمشو الخرطوم لأنه هنا مافي ليها علاج وطوالي كتبو لينا تحويل . تاني يوم من الصباح ركبنا جينا الخرطوم اول ما وصلنا مشينا وقابلنا الدكتور قال لينا ترقدو المستشفى دخلنا ورقدنا وابتدينا الفحوصات وصور الأشعة وما خلينا حاجه ما سويناها والمهم طرا على حالتها تحسن بسيط ما كتير والدكاتره في النهايه قالوا لينا امشو اهلكم وتعالو بعد شهر راجعين سبحان الله رقدنا اكتر من شهر في المستشفى خلاص كتبو لينا خروج واشترينا الأدوية ومرقنا من المستشفى ويعلم الله بي حالتي اولا جعانين انا واولادي غير كده تعريفه في يدي ما عندي مرقت على الحي المنان .
أول ما وقفنا قدام باب المستشفى عشان اعدي من الظلط شرطي المرور وقف لي العربات لاني ما كنت قادره اشيل البت الخيانه سايقاها بي رجليها وهي ما قادره تمشي المهم قطعنا الشارع ووقفت في نفس اللحظة وقفت قدامي عربيه وسايقاها بت اتلفتت على ونادتني يا اخت ، يا اخت عاينت ليها قلت ليها معاي انا ؟ قالت اي تعالى طبعا استغربت جدا قلت ليها مرحب سلمت عليها قالت لي اسمعي انتو كنتو في المستشفى راقدين قلت ليها اي قالت لي طلعوكم؟ قلت ليها اي . قالت لي وحسي ماشين وين ؟ قلت ليها ماشين المينا البري . قالت لي انا والله مستعجله لكن اصبري دقيقه ، طوالي نزلت من العربيه وأشرت ليها لي عربيه أمجاد واتكلمت معاهو ورجعت عربيتها ادتو قروش سواق الأمجاد لف جاني راجع قال اتفضلي اركبي يا اخت مش ماشه المينا البري قلت ليهو اااااي خلاص دور العربيه في اتجاه المينا البري .
في السكه سألني قال لي اسمعي يا اخت ست العربيه دي قريبتك قلت ليهو لا ، قال بتعرفيها ؟ قلت ليهو لا والله يا ود عمي حسي كان راجعه انا ما ح اعرفها لاني ما عاينت ليها كويس ربنا سبحانه وتعالى عالم بي حالتي عشان كده سخرها لي . قال لي يعني عملها ده عمل خير ؟ قلت ليهو اي . طوالي دخل ايده في جيبه قال لي هاك أمسكي ، قلت ليهو شنو ده ؟ قال لي القروش الادتني ليها الاستاذه ست العربيه قلت ليهو ده ما حقك انت انا ما اديتك حاجه قال حرم كان نمسكيهن يعني المره تعمل عمل الخير وانا الراجل أقصر على اليمين ما ممكن افو افو ، لما حلف انا مسكت القروش منه لما وصلت المينا البري طوالي نزل معاي وشال لي البت العيانه ومشى اشتري فطور ومعاهو عصير بااااااارد يعلم الله من الجوع كنت ما شايفه قدامي أكلنا انا واولادي وشكرته وشكرت ربنا من قبله بعد داك بالقروش الرجعها لي قطعنا التذاكر ومشينا البلد .

عن المحرر العام

موقع زراعي سياحي بيئي

شاهد أيضاً

بمناسبة اليوم العالمي للغابات 21 مارس من كل عام

1 – 3 أقوال وأشعار في الغابة والأشجار – الغابة رئة الأرض.. مصدر مجهول. – …

اترك تعليقاً

لن يتم نشر عنوان بريدك الإلكتروني.

error: Content is protected !!
البيئة بيتنا